తెలంగాణ /ఖమ్మం జిల్లా :
ఖమ్మం సిటీ: మాదక ద్రవ్యాలను పూర్తిగా నిర్మూలించి, భావితరాలకు ఆరోగ్యకరమైన, సురక్షితమైన భవిష్యత్తును అందించడమే లక్ష్యంగా పోలీస్ శాఖ నిరంతరం శ్రమిస్తోందని ఖమ్మం అర్బన్ ఇన్స్పెక్టర్ (సీఐ) భానుప్రకాష్ స్పష్టం చేశారు. మత్తు పదార్థాల మహమ్మారి నుంచి యువతను రక్షించేందుకు పోలీసు శాఖ ఆధ్వర్యంలో విస్తృత స్థాయిలో చర్యలు చేపడుతున్నట్లు ఆయన తెలిపారు. ఇందులో భాగంగా ఖమ్మం నగరంలోని నారాయణ కళాశాలలో విద్యార్థులకు మాదకద్రవ్యాల వినియోగం,వాటి అనర్థాలపై ప్రత్యేక అవగాహన సదస్సును నిర్వహించారు….ఈ కార్యక్రమంలో విద్యార్థులను ఉద్దేశించి ఇన్స్పెక్టర్ భానుప్రకాష్ మాట్లాడుతూ.. ప్రస్తుత సమాజంలో కొందరు యువత పెడదోవ పట్టి సులభంగా మత్తు పదార్థాలకు ఆకర్షితులవుతున్నారని ఆవేదన వ్యక్తం చేశారు. డ్రగ్స్, గంజాయి వంటి మాదకద్రవ్యాలకు బానిసలవడం వల్ల విద్యార్థుల ఉజ్వల భవిష్యత్ పూర్తిగా నాశనమవుతుందని హెచ్చరించారు. క్షణికానందం కోసం అలవాటుగా మారే ఈ మత్తు.. చివరకు కెరీర్తో పాటు ప్రాణాలకే ముప్పుగా పరిణమిస్తుందని, వారిపై ఆధారపడిన కుటుంబాలు మానసికంగా, ఆర్థికంగా కుంగిపోతాయని వివరించారు…..
విద్యార్థులు క్రీడలు, సృజనాత్మకత వైపు అడుగులు వేయాలి….
విద్యార్థులు చెడు వ్యసనాలకు దూరంగా ఉంటూ, లక్ష్యంపైనే పూర్తి దృష్టి సారించాలని సీఐ సూచించారు. “కేవలం చదువు మాత్రమే కాకుండా, ఖాళీ సమయాల్లో క్రీడలు, ఇతర సృజనాత్మక కార్యక్రమాల్లో (ఆర్ట్స్, స్కిల్ డెవలప్మెంట్) చురుగ్గా పాల్గొనాలి. తద్వారా శారీరక, మానసిక ఉల్లాసం పెంపొందుతుంది. ఒత్తిడికి లోనుకాకుండా ఆరోగ్యకరమైన జీవనశైలిని అలవర్చుకోవాలి” అని ఆయన హితవు పలికారు.అంతే కాకుండా మత్తు పదార్థాల నివారణలో కేవలం పోలీసుల పాత్రే కాకుండా సమాజం, ముఖ్యంగా విద్యాసంస్థలు మరియు యువత భాగస్వామ్యం ఎంతో అవసరమని ఆయన ఉద్ఘాటించారు. కళాశాలల్లో యువత, విద్యార్థులు ‘యాంటీ డ్రగ్స్ కమిటీ’లో సభ్యులుగా చేరాలని ఆయన పిలుపునిచ్చారు. తోటి విద్యార్థులను చెడు వ్యసనాల వైపు వెళ్లకుండా చైతన్యపరుస్తూ, పోలీసులకు సమాచారం అందించే ‘యాంటీ డ్రగ్స్ సోల్జర్’లుగా (Anti-Drug Soldiers) ప్రతి ఒక్కరూ బాధ్యత తీసుకోవాలని కోరారు. ఎవరైనా డ్రగ్స్ విక్రయించినా, వినియోగించినా వెంటనే పోలీసులకు లేదా డయల్ 100కు సమాచారం అందించాలని సూచించారు…..
ఆలోచింపజేసిన ప్రశ్నోత్తరాల కార్యక్రమం….
ఈ కార్యక్రమం కేవలం ఉపన్యాసాలకే పరిమితం కాకుండా, మాదక ద్రవ్యాల వినియోగం వల్ల కలిగే అనర్థాలపై ఇన్స్పెక్టర్ విద్యార్థులను పలు ప్రశ్నలు అడిగి వారిలో ఆలోచనను రేకెత్తించారు. విద్యార్థులు కూడా ఉత్సాహంగా సమాధానాలు చెబుతూ సదస్సులో చురుగ్గా పాల్గొన్నారు.ఈ కార్యక్రమంలో నారాయణ కళాశాల ప్రిన్సిపాల్, అధ్యాపక బృందం, పోలీస్ సిబ్బంది మరియు భారీ సంఖ్యలో విద్యార్థులు పాల్గొన్నారు….
పత్తి శ్రీనివాస్, జనం ముచ్చట న్యూస్, హైదరాబాద్ :9703973456
