తెలంగాణ /ఖమ్మం జిల్లా :
ఖమ్మం సిటీ :ఆసియాలోనే అతిపెద్ద వ్యవసాయ మార్కెట్లలో ఒకటైన ఖమ్మం వ్యవసాయ మార్కెట్లో అక్రమాల పర్వం నిరాటంకంగా కొనసాగుతోంది. అన్నదాతలకు అండగా ఉండాల్సిన మార్కెట్ కమిటీ పాలక వర్గం, అధికారులే కంచె చేను మేసిన చందంగా వ్యవహరిస్తున్నారు. ఖమ్మం మిర్చి కోల్డ్ స్టోరేజీల వేదికగా కోట్ల రూపాయల ‘ఆర్డీ (RD) దందా’ (అండర్ బిల్లింగ్ వ్యవహారం) యథేచ్ఛగా సాగుతోంది. ముడుపుల మత్తులో మునిగి తేలుతున్న అధికారులు, ప్రభుత్వ ఆదాయానికి భారీగా గండి కొడుతూ ట్రేడర్లకు రెడ్ కార్పెట్ పరుస్తున్నారు.
ప్రతి యేటా 30 లక్షల బస్తాలు నిలువ … కోట్లల్లో కమీషన్లు….
ఖమ్మం చుట్టుపక్కల ప్రాంతాల్లో ఉన్న కోల్డ్ స్టోరేజీలలో రైతులు ప్రతి యేటా దాదాపు 30 లక్షలకు పైగా మిర్చి బస్తాలను నిల్వ చేయడం జరుగుతుంది ,ధర వస్తుందన్న ఆశతో రైతులు నిల్వ చేసుకున్న ఈ మిర్చిపైనే ఇప్పుడు దళారులు, కొందరు అవినీతి అధికారులు కన్నేశారు. కోల్డ్ స్టోరేజీలలో జరిగే క్రయవిక్రయాలకు సంబంధించి ట్రేడర్లు “ఫుల్ బిల్” (పక్కా రశీదు) ఇవ్వకుండా, కేవలం ‘ఆర్డీ’ (అండర్ బిల్లింగ్/రికార్డ్ మానిప్యులేషన్) రూపంలో గుట్టుచప్పుడు కాకుండా కొనుగోళ్లు జరుపుతున్నారు. నిబంధనల ప్రకారం కోల్డ్ స్టోరేజీల వద్ద జరిగే కొనుగోళ్లపై మార్కెట్ కమిటీ అధికారుల పర్యవేక్షణ ఉండాలి. కానీ, వారే ఈ దందాకు సహకరిస్తుండటం గమనార్హం…..
బస్తాకు రూ.25 వసూలు… ప్రభుత్వాలకు వందల కోట్ల నష్టం….
ఇలా అండర్ బిల్ కింద కొనుగోళ్లు జరపడం వల్ల కేంద్ర, రాష్ట్ర ప్రభుత్వాలకు చెల్లించాల్సిన జీఎస్టీ (GST) తదితర పన్నులతో పాటు, ఖమ్మం వ్యవసాయ మార్కెట్కు రావాల్సిన మార్కెట్ సెస్సుకు భారీ గండి పడుతోంది. దీనివల్ల ప్రభుత్వ ఖజానాకు వందల కోట్ల రూపాయల నష్టం వాటిల్లుతోంది. ఈ ఆర్డీ, అండర్ బిల్ దందాకు సహకరిస్తున్నందుకు గాను మార్కెట్ కమిటీకి, కొందరు అధికారులకు ట్రేడర్లు బస్తాకు రూ. 20 నుంచి రూ. 25 వరకు అనధికారికంగా చెల్లిస్తున్నట్లు సమాచారం. ఈ లెక్కన 30 లక్షల బస్తాలకు ముడుపుల రూపంలోనే సుమారు రూ. 6 నుంచి 7 కోట్లు చేతులు మారుతున్నట్లు ఓ మిర్చి కొనుగోలుదారుడు (ట్రేడర్) ఆఫ్ ది రికార్డుగా వెల్లడించడం ఈ అవినీతి సామ్రాజ్యం లోతును తెలియజేస్తోంది….
అంతా ఆయన కనుసన్నల్లోనే దందా… గుసగుసలాడుతున్న సిబ్బంది….
ఈ మొత్తం “ఆర్డీ దందా”లో ఖమ్మం మార్కెట్ కమిటీ వైస్ చైర్మన్తో పాటు మార్కెట్ సెక్రటరీ కీలక పాత్ర పోషిస్తున్నట్లు మార్కెట్ వర్గాల్లో తీవ్ర స్థాయిలో గుసగుసలు వినిపిస్తున్నాయి. వీరిద్దరి కనుసన్నల్లోనే కోల్డ్ స్టోరేజీ యాజమాన్యాలు, ట్రేడర్ల మధ్య ఈ చీకటి ఒప్పందం కుదిరినట్లు ఆరోపణలు వెల్లువెత్తుతున్నాయి. తనిఖీలు చేయాల్సిన అధికారులే నెలవారీ మామూళ్లకు అలవాటు పడి రైతుల పొట్ట కొడుతున్నారని స్థానికులు మండిపడుతున్నారు.ఈ దందా కేవలం పన్నుల ఎగవేతకే పరిమితం కాలేదు. అండర్ బిల్లింగ్ కారణంగా రైతులకు సరైన రశీదులు దక్కడం లేదు. దీనివల్ల భవిష్యత్తులో రైతులకు ధరల వ్యత్యాసం వచ్చినా, లేదా బీమా వంటి ప్రయోజనాలు పొందాలన్నా సరైన ఆధారాలు ఉండటం లేదు. అంతేకాకుండా కోల్డ్ స్టోరేజీల్లో తూకాల్లో కూడా పెద్ద ఎత్తున మోసాలు జరుగుతున్నాయన్న విమర్శలు ఉన్నాయి. ప్రశ్నించిన రైతులను ట్రేడర్లు, అధికారులు సంయుక్తంగా బెదిరింపులకు గురిచేస్తున్న పరిస్థితులు నెలకొన్నాయి….
మంత్రి గారి ఇలాకాలోనే ఈ పరిస్థితా?
రాష్ట్ర వ్యవసాయ శాఖ మంత్రి ప్రాతినిధ్యం వహిస్తున్న సొంత నియోజకవర్గమైన ఖమ్మంలోనే ఇంత బహిరంగంగా అడ్డదారిలో ఆర్డీ దందా జరగడంపై సర్వత్రా విస్మయం వ్యక్తమవుతోంది. మంత్రి ప్రతిష్టను దిగజార్చేలా మార్కెట్ పాలకవర్గం వ్యవహరిస్తున్న తీరుపై అధికార పార్టీలోనూ భిన్నాభిప్రాయాలు వ్యక్తమవుతున్నాయి. వ్యవసాయ శాఖకు పెద్దదిక్కుగా ఉన్న మంత్రి ఇలాకాలోనే రైతులకు, ప్రభుత్వానికి ఇంత అన్యాయం జరుగుతుంటే నిఘా వర్గాలు (Vigilance) ఏం చేస్తున్నాయన్న ప్రశ్నలు ఉత్పన్నమవుతున్నాయి.ఏది ఏమైనా ఖమ్మం మార్కెట్ చుట్టూ అల్లుకున్న ఈ అవినీతి వలయాన్ని ఛేదించాలంటే ఉన్నతాధికారులు తక్షణమే స్పందించాల్సిన అవసరం ఉంది. రాష్ట్ర విజిలెన్స్ అండ్ ఎన్ఫోర్స్మెంట్ (V&E) విభాగం లేదా సీఐడీతో ఈ కోల్డ్ స్టోరేజీల రికార్డులపై ఆకస్మిక దాడులు నిర్వహించి, సమగ్ర విచారణ జరిపితే కోట్ల రూపాయల కుంభకోణం బయటపడే అవకాశం ఉంది. రాష్ట్ర ప్రభుత్వం, వ్యవసాయ శాఖ మంత్రి ఈ వ్యవహారంపై ఎలా స్పందిస్తారో, అక్రమార్కులపై ఎలాంటి కొరడా ఝుళిపిస్తారో వేచి చూడాలి…..
పత్తి శ్రీనివాస్, జనం ముచ్చట న్యూస్, హైదరాబాద్ :9703973456
