తెలంగాణ/హైదరాబాద్:
హైదరాబాద్, సెప్టెంబర్ 4: మాజీ మంత్రి కొండా సురేఖను తెలంగాణ మంత్రివర్గం నుంచి బర్తరఫ్ చేయడంపై ఆమె కుమార్తె కొండా సుస్మిత తీవ్రస్థాయిలో స్పందించారు. తాను చేసిన వ్యాఖ్యలకు తన తల్లిని బాధ్యురాలిని చేసి మంత్రి పదవి నుంచి తొలగించడం ఎంతవరకు సమంజసమని ముఖ్యమంత్రి రేవంత్ రెడ్డిని ఆమె ప్రశ్నించారు.తాను కాంగ్రెస్ పార్టీకి వ్యతిరేకంగా ఎప్పుడూ మాట్లాడలేదని, కేవలం ఒక వ్యక్తిని ఉద్దేశించి మాత్రమే తన అభిప్రాయాలను వ్యక్తం చేశానని కొండా సుస్మిత స్పష్టం చేశారు. అయితే తన వ్యాఖ్యలకు తన తల్లి కొండా సురేఖను బలి చేయడం అన్యాయమని ఆమె ఆవేదన వ్యక్తం చేశారు….
రేవంత్ రెడ్డి వన్ టైమ్ సీఎం….
రేవంత్ రాజకీయ ప్రస్థానాన్ని ప్రస్తావించిన సుస్మిత
ముఖ్యమంత్రి రేవంత్ రెడ్డిపై సుస్మిత ఘాటు వ్యాఖ్యలు చేశారు. రేవంత్ రెడ్డి ఒకసారి జెడ్పీటీసీగా, ఒకసారి ఎమ్మెల్సీగా, ఒకసారి ఎమ్మెల్యేగా, ఒకసారి ఎంపీగా పనిచేశారని పేర్కొన్నారు. మరోవైపు తన తల్లి కొండా సురేఖ ప్రజల మద్దతుతో ఆరుసార్లు ఎమ్మెల్యేగా ఎన్నికయ్యారని గుర్తు చేశారు.ఇంతటి రాజకీయ అనుభవం, ప్రజా జీవితం ఉన్న తన తల్లిని అవమానించడం తనను తీవ్రంగా కలచివేసిందని సుస్మిత అన్నారు. బీసీ వర్గాలకు చెందిన నాయకులను లక్ష్యంగా చేసుకుని రాజకీయంగా అణచివేసే ప్రయత్నాలు జరుగుతున్నాయంటూ ఆమె ఆరోపించారు….
బండి సంజయ్ కొడుకు ఉదంతం ప్రస్తావన…
కేంద్రమంత్రి బండి సంజయ్ కుమారుడికి సంబంధించిన పోక్సో కేసు నమోదైన సందర్భంలో, కొడుకు చేసిన తప్పుకు తండ్రిని ఎలా అరెస్టు చేస్తామని రేవంత్ రెడ్డి ప్రశ్నించిన విషయాన్ని సుస్మిత ప్రస్తావించారు.“అప్పుడు కొడుకు చేసిన తప్పుకు తండ్రిని బాధ్యుడిని చేయకూడదని చెప్పిన రేవంత్ రెడ్డి, ఇప్పుడు నేను చేసిన వ్యాఖ్యలకు మా అమ్మను ఎలా బాధ్యురాలిని చేస్తారు?” అని ఆమె ప్రశ్నించారు. తన వ్యక్తిగత వ్యాఖ్యలకు కొండా సురేఖకు సంబంధం లేదని గతంలోనే స్పష్టం చేసినప్పటికీ, ఆమెపై చర్యలు తీసుకోవడం పట్ల సుస్మిత తీవ్ర అభ్యంతరం వ్యక్తం చేశారు….
కొండా కుటుంబం–కాంగ్రెస్ మధ్య విభేదాల నేపథ్యంలో వేటు…
పరకాల రాజకీయాలు, సీఎం రేవంత్ రెడ్డిపై కొండా సుస్మిత చేసిన విమర్శలు గత కొంతకాలంగా తెలంగాణ కాంగ్రెస్లో తీవ్ర చర్చకు దారితీశాయి. ఈ వ్యాఖ్యలపై పార్టీ నాయకత్వం తీవ్రంగా స్పందించగా, కొండా సురేఖ తన కుమార్తె వ్యాఖ్యలు వ్యక్తిగతమైనవేనని వివరణ ఇచ్చినట్లు వార్తలు వచ్చాయి. అయితే ఈ వివాదం పార్టీ క్రమశిక్షణా అంశంగా మారడంతో కాంగ్రెస్ అధిష్ఠానం చర్యలకు ఉపక్రమించింది.తాజా పరిణామాల్లో కొండా సురేఖను మంత్రివర్గం నుంచి తొలగించే ప్రక్రియ పూర్తవడం తెలంగాణ రాజకీయాల్లో తీవ్ర సంచలనం సృష్టించింది. ఈ నిర్ణయంపై కొండా కుటుంబం తీవ్ర అసంతృప్తి వ్యక్తం చేస్తుండగా, కాంగ్రెస్ అధిష్ఠానం మాత్రం పార్టీ క్రమశిక్షణకు ప్రాధాన్యత ఇచ్చినట్లు రాజకీయ వర్గాల్లో చర్చ జరుగుతోంది….
“నా పోరాటం పార్టీకి వ్యతిరేకం కాదు”..
తన పోరాటం కాంగ్రెస్ పార్టీకి వ్యతిరేకంగా కాదని కొండా సుస్మిత మరోసారి స్పష్టం చేశారు.తనకు నచ్చని ఒక వ్యక్తి రాజకీయ వైఖరిని మాత్రమే ప్రశ్నించానని పేర్కొన్నారు. వ్యక్తిగతంగా తాను చేసిన వ్యాఖ్యలకు తన తల్లిని శిక్షించడం సరికాదని ఆమె ప్రశ్నించారు.“నేను మాట్లాడితే మా అమ్మను ఎందుకు బలి చేశారు?” అంటూ సుస్మిత సంధించిన ప్రశ్న ప్రస్తుతం తెలంగాణ రాజకీయాల్లో హాట్టాపిక్గా మారింది.కొండా సురేఖ బర్తరఫ్ వ్యవహారం, సుస్మిత తాజా వ్యాఖ్యలతో కాంగ్రెస్లో అంతర్గత రాజకీయాలు మరింత చర్చనీయాంశంగా మారాయి. ఈ పరిణామాలపై కాంగ్రెస్ అధిష్ఠానం, రాష్ట్ర నాయకత్వం ఎలా స్పందిస్తుందనేది ఆసక్తికరంగా మారింది….
పత్తి శ్రీనివాస్, జనం ముచ్చట న్యూస్, హైదరాబాద్:9703973456
