భద్రాద్రి కొత్తగూడెం జిల్లా/అశ్వాపురం
భద్రాద్రి కొత్తగూడెం (జనం ముచ్చట):
ఉమ్మడి ఖమ్మం జిల్లాలో తాగునీటి అవసరాలకు ఎలాంటి ఇబ్బందులు తలెత్తకుండా రాష్ట్ర ప్రభుత్వం ప్రత్యేక చర్యలు చేపట్టింది. గోదావరి నదిలో నీటి నిల్వను పెంచి, భవిష్యత్తులో తాగునీటి కొరత ఏర్పడకుండా ముందస్తు ప్రణాళికతో అడుగులు వేస్తోంది. ఇందులో భాగంగా భద్రాద్రి కొత్తగూడెం జిల్లా అశ్వాపురం మండల పరిధిలోని దుమ్ముగూడెం ఆనకట్టపై సుమారు ఒక మీటరు ఎత్తున ఇసుక బస్తాలను ఏర్పాటు చేసి, గోదావరి జలాలను నిల్వ చేసేందుకు పనులు చేపట్టింది. ఈ ఏర్పాట్ల ద్వారా సుమారు ఒక టీఎంసీ నీటిని నిల్వ చేయాలని లక్ష్యంగా పెట్టుకుంది….
మంత్రి తుమ్మల చొరవతో పనులకు శ్రీకారం…
ఉమ్మడి ఖమ్మం జిల్లాలో తాగునీటి అవసరాలను దృష్టిలో ఉంచుకొని దుమ్ముగూడెం ఆనకట్ట వద్ద నీటి నిల్వ పెంపు ఆవశ్యకతను రాష్ట్ర మంత్రి తుమ్మల నాగేశ్వరరావు ముఖ్యమంత్రి రేవంత్ రెడ్డి దృష్టికి తీసుకెళ్లారు. గోదావరిలో నీటిని నిల్వ చేసుకోవడం ద్వారా జిల్లా ప్రజల తాగునీటి అవసరాలను తీర్చేందుకు వీలుంటుందని వివరించారు. మంత్రి విజ్ఞప్తిపై స్పందించిన ముఖ్యమంత్రి వెంటనే పనులు ప్రారంభించాలని సంబంధిత అధికారులను ఆదేశించారు.
దీపావళి నాటికి పనులు పూర్తి చేసే లక్ష్యం
ముఖ్యమంత్రి ఆదేశాల మేరకు ఇరిగేషన్ శాఖ అధికారులు దుమ్ముగూడెం ఆనకట్ట వద్ద నీటి నిల్వకు అవసరమైన ఏర్పాట్లను చేపట్టారు. ఇరిగేషన్ శాఖ చీఫ్ ఇంజినీర్ (సీఈ) శ్రీనివాసరెడ్డి పర్యవేక్షణలో పనులు కొనసాగుతున్నాయి. నిర్ణీత గడువులోగా పనులను పూర్తి చేసి, నీటి నిల్వకు అవసరమైన ఏర్పాట్లు సిద్ధం చేయడంపై అధికారులు దృష్టి సారించారు. దీపావళి నాటికి పనులు పూర్తిచేసేలా చర్యలు తీసుకుంటున్నారు….
పనుల పురోగతిపై మంత్రి పర్యవేక్షణ….
ఇవి కూడా చదవండి
దుమ్ముగూడెం ఆనకట్ట వద్ద చేపట్టిన పనుల పురోగతిని మంత్రి తుమ్మల నాగేశ్వరరావు ఎప్పటికప్పుడు అధికారులను అడిగి తెలుసుకుంటున్నారు. పనులను వేగవంతం చేయడంతోపాటు నిర్దేశిత సమయంలోగా పూర్తి చేయాలని సూచిస్తున్నారు. గోదావరిలో అందుబాటులో ఉన్న జలాలను సమర్థంగా వినియోగించుకొని ఉమ్మడి ఖమ్మం జిల్లాలో తాగునీటి అవసరాలకు భరోసా కల్పించడమే ఈ చర్యల ప్రధాన ఉద్దేశం….
తాగునీటి సమస్యకు ముందస్తు పరిష్కారం….
వేసవి సహా ఇతర సమయాల్లో తాగునీటి సరఫరాకు ఇబ్బందులు తలెత్తకుండా నీటి నిల్వను పెంచుకోవడం కీలకమని ప్రభుత్వం భావిస్తోంది. ఈ నేపథ్యంలో దుమ్ముగూడెం ఆనకట్ట వద్ద ఇసుక బస్తాలతో నీటిని నిల్వ చేసే చర్యలు ప్రాధాన్యం సంతరించుకున్నాయి. సుమారు ఒక టీఎంసీ నీటిని నిల్వ చేయగలిగితే ఉమ్మడి ఖమ్మం జిల్లాలో తాగునీటి అవసరాల నిర్వహణకు తోడ్పడే అవకాశం ఉంది. ముఖ్యమంత్రి ఆదేశాలు, మంత్రి తుమ్మల పర్యవేక్షణతో పనులను దీపావళి నాటికి పూర్తి చేసేందుకు అధికారులు కృషి చేస్తున్నారు…
